افغان پلاوي د عشق آباد د تېلو او ګاز نړیوال نندارتون کې ګډون وکړ
د ا.ا.ا د صنایعو او سوداګرۍ وزیر، ملا نورالدین عزیزي، د یو لوړ پوړي دولتي پلاوي په مشرۍ د ترکمنستان د حکومت د بلنې په اساس د عشق آباد ښار ته لاړ او هلته یې د تېلو او ګاز په دېرشم نړیوال نندارتون او کنفرانس کې ګډون وکړ.
دغه نړیوال کنفرانس د بېلابېلو هېوادونو د لوړپوړو چارواکو، متخصصینو او د نړیوالو شرکتونو د استازو په ګډون ترسره شو.
د یاد نندارتون موخه د سیمه ییزو اقتصادي همکاریو پیاوړتیا او د انرژۍ د سکتور پراختیا ښودل شوې ده.
په دې سفر کې، وزیر نورالدین عزیزي د څو هېوادونو له دولتي چارواکو او بهرنیو پانګوالو سره جلا جلا لیدنې وکړې او د اقتصادي اړیکو د پراخېدو، پانګونې د جلب او د تېلو، ګاز او اړوندو صنایعو د ګډو پروژو په اړه یې خبرې وکړې.
د چارواکو په وینا، د افغان پلاوي فعاله ونډه د اسلامي امارت هغه هڅې څرګندوي چې غواړي د افغانستان سیمه ییز اقتصادي پانګونکو د راجلبولو او د بهرنیو پانګونو لپاره ښه فرصتونه رامنځته کړي.
