روسیې له لویدیځو هېوادونو غوښتي چې د افغانستان کنګل شوې شتمني ازاده کړي
د روسیې د بهرنیو چارو وزیر سرګي لاوروف مسکو فارمټ مشورتي ناستې ته د وینا پر مهال له لویدیځو هېوادونو او په ځانګړي ډول له امریکا متحده ایالاتو غوښتي چې د افغانستان کنګل شوې شتمني ازاده کړي.
ده زیاته کړې چې د لویدیځ مسولیت جوړېږي تر څو د افغانستان په ابادۍ کې ونډه واخلي.
د افغانستان په اړه د روسیې له لوري جوړه شوې غونډه (مسکو فارمټ) مشورتي ناسته تېره ورځ ترسره شوه، چې پکې ګډونوالو هېوادونو د دې هېواد په امنیت، ثبات او د همکاریو پراختیا باندې خبرې اترې وکړې.
دې غونډه کې د روسیې، ایران، چین، هند، پاکستان، قزاقستان، تاجکستان، ترکمنستان، ازبکستان او قرغیزستان استازو ګډون کړی و او د افغانستان له لوري د بهرنیو چارو وزیر مولوي امیرخان متقي د لومړي ځل لپاره د رسمي غړي په توګه د مسکو فارمټ مشورتي ناسته کې ګډون وکړ.
له دې سره ترخوا هغه د افغانستان د شتمنۍ په کنګل کېدو نیوکه کړې او دا ګام يي د یو هېواد له حقوقو ښکاره سرغړونه یاده کړې.
نوموړي د داعش ډلې او نشه يي توکو پر وړاندې د اسلامي امارت روانه مبارزه ستایلې او په دې برخه کې يي د هر ډول همکارۍ ډاډ ورکړی دی.
هغه وویل: «تاریخ موږ ته د بهرني پوځ د لاسوهنو ناوړه پایلې ښودلې دي، موږ دا تېروتنې بیا نه شو تکرارولی.»
د یادونې وړ ده چې له دې سره ترخوا د افغانستان لپاره د روسیې ځانګړي استازي ضمیر کابلوف ویلي مسکو په دې هېواد کې د هیڅ پوځي اډې جوړولو نیت نه لري او له نورو هېوادونو هم ورته غوښتنه لري.
