د هرات لوی جامع جومات د بیارغولو چارې روانې دي
د یاد جومات بام چې ۲۱ زره متره مربع دی چارې یې نږدې دوه کاله مخکې پیل شوې وې چې تر اوسه یې د نږدې څلور زره متره مربع چارې بشپړې شوي دي.
د یاد تاریخي جومات د بام بیا رغولو کې د خښتو په مرسته د بام پوښل شامل دي چې له یاد بهیر وروسته به یې د دیوالونو د کاشیانو نوي کول پیل شي.
د هرات جامع جومات د بیا رغولو دا بهیر د کور او ښار جوړونې او اطلاعات او کلتور وزارتونو ترڅنګ د بهرنیو موسساتو په مرسته ترسره کیږي.
د هرات اوسېدونکي له حکومت غواړي چې د هرات جامع جومات په څېر دې په ټولو ولایتونو کې تاریخي آبدو ته ځانګړې پاملرنه وشي او د بیارغولو او ساتلو برخه کې مهم ګامونه واخیستل شي.
د هرات جامع جومات افغانستان کې تر ټولو ستر جومات دی چې د هېواد له خورا مهم تاریخي آبدو څخه ګڼل کیږي.
هرات ولایت کې ټولټال ۷۸۰ تاریخي آبدات شته چې ډیری هغه یې له یونسکو سازمان سره ثبت هم دي.
